Nəsimi buranı görsə, hüsnünə heyran olardı... - Video

Xəbər verdiyimiz kimi, Prezident İlham Əliyev və birinci xanım Mehriban Əliyeva bu gün Şamaxıda “Nəsimi Bağları” kompleksi ilə tanış olublar.

“ARHD.MEDiA” “Nəsimi Bağları” kompleksinin görüntülərini təqdim edir:

Prezidentlə xanımı Şamaxıda daha bir hotel açılışında - Fotolar

Azərbaycan Prezidenti İlham Əliyev və birinci xanım Mehriban Əliyeva bu gün Şamaxıda “Pirqulu Park” hotelinin açılışında iştirak ediblər.

“ARHD.MEDiA” xəbər verir ki, “Moderngroup” MMC-nin təmsilçisi Fariz Abbaszadə dövlət başçısına və birinci xanıma hoteldə yaradılmış şərait barədə məlumat verib.

Bildirilib ki, Pirqulu qəsəbəsində inşa edilən hotel Şamaxı Astrofizika Rəsədxanasının yaxınlığında yerləşir. Ərazisi 16 hektar olan kompleksə 2 hotel binası daxildir. Binalardan biri 188, digəri isə 172 yerlikdir. Burada müxtəlif kateqoriyadan 175 nömrə və 2 kottec var. Bu isə eyni vaxtda hoteldə 366 qonağın qalmasına imkan verir. Kompleksdə restoranlar, kafelər, görüş və təlimlər üçün 160 yerlik zal mövcuddur. Ərazidə 600 nəfərlik konqres binası, uşaq əyləncə mərkəzi, amfiteatr yaradılıb.

Qeyd edək ki, Azərbaycanda turizm sektorunun davamlı və hərtərəfli inkişafı dövlət siyasətinin prioritet istiqamətlərindən birini təşkil edir. Vətənimizin zəngin təbii resursları, qədim tarixi-mədəni irsi və nadir iqlim müxtəlifliyi ilə yanaşı, turizm sənayesinin inkişafı ilə bağlı dövlət səviyyəsində görülən işlər Azərbaycanı dünyanın hər yerindən olan turistlər üçün cəlbedici ölkəyə çevirib.

“Bədxahlarımızda yaradıcılıq çatışmır” - Prezident

“Bugünkü təhdidlərin təkcə fiziki deyil, həm də ideoloji xarakter daşımasına gəldikdə isə hesab edirəm ki, bu barədə danışmağa ehtiyac yoxdur, hamımız bunu çox yaxşı bilirik”.

“ARHD.MEDiA” xəbər verir ki, bu sözləri Prezident İlham Əliyev TDT-yə üzv ölkələrin təhlükəsizlik üzrə rəhbər şəxslərini qəbul edərkən bildirib.

Dövlət başçısı qeyd edib ki, ölkələrimizin ardıcıl inkişafını və konstitusiya quruluşunun qorunmasını təmin etmək üçün ölkələrimizə və xalqlarımıza zidd hər cür ideoloji təxribatlara qarşı birgə mübarizə aparmaq lazımdır: “O cümlədən adətən ölkələrimizin hüdudlarından çox uzaqda yerləşən, lakin nədənsə məlum mərkəzlərdən maliyyələşən müxtəlif media strukturları vasitəsilə həyata keçirilən təxribatlara qarşı. Bu maliyyələşdirmə ölkələrimizin dövlət quruluşunun sarsıdılmasına, ictimai həmrəyliyin pozulmasına, yad narrativlərin və dəyərlərin aşılanmasına yönəlib. Biz buna qarşı Azərbaycanda çox fəal mübarizə aparırıq və deməliyəm ki, böyük uğurlar əldə etmişik.

Azərbaycanda xain, antimilli, satqın strukturlar, mahiyyət etibarilə son dərəcə marjinal xarakter daşıyır. Ən başlıcası isə onlar xalqımızın mütləq əksəriyyəti tərəfindən ittiham olunur. Çünki Azərbaycanda mənəvi dəyərlərə, ənənələrə, həyat tərzimizə sadiqlik, yenə də əsas istiqamətdir, başlıca tendensiyadır. Buna zərər vurmağa çalışan hər şey cəmiyyətimiz tərəfindən son dərəcə mənfi qarşılanır. Lakin bu, bütün işləri başa çatdırdığımız anlamına gəlmir, çünki ölkələrimizdə sabitliyi pozmaq cəhdləri davam etdiriləcək”.

“Əminəm ki, hər biriniz öz ölkənizdəki vəziyyəti çox yaxşı bilirsiniz. Təbii ki, ölkələrimizdə vəziyyət eyni deyil. Lakin müəyyən beynəlxalq mərkəzlərdən ölkələrimizin dövlət maraqlarının sarsıdılmasına yönəlmiş fəaliyyət prinsipləri dəyişməz olaraq qalır. Həm metodlar, həm də məqsədlərinə nail olmaq cəhdləri kifayət qədər şablon xarakter daşıyır, deyərdim ki, primitivdir. Bir sözlə, bədxahlarımızda, deyərdim ki, yaradıcılıq çatışmır. Əlbəttə ki, onlar əsas səylərini hələ formalaşmamış, formalaşma mərhələsində olan və manipulyasiya etməyin daha asan olduğu gənc nəslə yönəldirlər. Məhz buna görə deyirəm, bilirəm ki, ölkələrimizin hər birində fəal gənclər siyasəti həyata keçirilir. Lakin hesab edirəm ki, TDT çərçivəsində məhz gənclər təşkilatlarımızın qarşılıqlı fəaliyyətinə daha çox diqqət yetirməliyik, müntəzəm tədbirlər, forumlar, konfranslar keçirməliyik ki, gənc vətəndaşlarımız bir-biri ilə ünsiyyət qursunlar. Onlar qohum xalqlara bizim nəslin münasibət göstərdiyi kimi münasibət göstərsinlər. Bunu, əlbəttə, öz nümunəmiz, uğurlu fəaliyyətimiz, təşkilatımızın möhkəmləndirilməsi ilə yanaşı, düzgün ideoloji iş vasitəsilə onlara ötürməliyik”, - İlham Əliyev vurğulayıb.

“Bugünkü şəraitdə enerji təhlükəsizliyi ilə bağlı məsələlər mühüm əhəmiyyət kəsb edir” - Yenilənib

“Türk Dövlətləri Təşkilatı çox böyük beynəlxalq nüfuza malik olan təşkilatdır”.

“ARHD.MEDiA” xəbər verir ki, bu sözləri Prezident İlham Əliyev TDT-yə üzv ölkələrin təhlükəsizlik üzrə rəhbər şəxslərini qəbul edərkən söyləyib.

Dövlət başçısı deyib ki, müxtəlif formatlarda müzakirə olunan məsələlər beynəlxalq gündəliyi, beynəlxalq təhlükəsizliyi, multikulturalizm, ticarət, nəqliyyat, ümumilikdə humanitar əməkdaşlıqla bağlı məsələləri əhatə edir.

İlham Əliyev həmçinin qeyd edib ki, təşkilata üzv ölkələrin rəhbərlərinin ümumi mövqeyi məhz ondan ibarətdir ki, beynəlxalq arenada TDT-nin rolunu və yerini gücləndirək: “Bunun üçün bütün imkanlar var. Ölkələrimizin potensialı kifayət qədər böyükdür və güclənməkdə davam edir. Biz çox geniş coğrafi məkanda yerləşirik”.

Prezident vurğulayıb ki, ölkələrimiz böyük təbii ehtiyatlara malikdir və bu da böyük üstünlükdür: “Bu təbii ehtiyatlar dövlətlərimizin möhkəmlənməsinə, xalqlarımızın rifahının yüksəlməsinə xidmət edir, həmçinin bütün dünya üçün mühüm rol oynayır”.

Dövlətimizin başçısı bildirib ki, xüsusilə sərhədlərimizin perimetri boyunca mövcud olan bugünkü şəraitdə enerji təhlükəsizliyi ilə bağlı məsələlər mühüm əhəmiyyət kəsb edir.

***

“Bu gün isə mahiyyət etibarilə problemlərin böyük hissəsini, problemlər deyərkən qarşımızda duran qlobal problemləri nəzərdə tuturam, arxada qoymuşuq.

Qarşıda isə birgə iş, qarşılıqlı fəaliyyətin möhkəmləndirilməsi, ölkələrimiz və xalqlarımız arasında daha sıx əlaqələrin qurulması, Türk Dövlətləri Təşkilatının beynəlxalq arenadakı rolunun gücləndirilməsi dayanır. Biz birgə səylərimizlə TDT-ni aparıcı beynəlxalq institutlardan, aparıcı beynəlxalq təşkilatlardan birinə çevirməyə çalışmalıyıq”, - Prezident əlavə edib.

Prezidentdən toplantı iştirakçılarına - Müraciət

Azərbaycan Prezidenti İlham Əliyev Türk Dövlətləri Təşkilatına üzv ölkələrin Təhlükəsizlik Şuraları katiblərinin Beşinci Toplantısının iştirakçılarına müraciət edib.

“ARHD.MEDiA” xəbər verir ki, müraciətdə deyilir:

“Hörmətli tədbir iştirakçıları!

Sizi Türk Dövlətləri Təşkilatına üzv ölkələrin Təhlükəsizlik Şuraları katiblərinin Beşinci Toplantısında Bakı şəhərində səmimi-qəlbdən salamlayıram. Azərbaycana xoş gəlmisiniz! Bu mötəbər tədbirin ilk dəfə Azərbaycanda təşkil edilməsi məmnunluq doğurur.

Qardaş xalqlarımızı ortaq etnik köklər, dil, mədəniyyət və ənənələr möhkəm ailə kimi birləşdirir. Təbii müttəfiqliyimizi rəsmiləşdirən Türk Dövlətləri Təşkilatı geniş coğrafi məkanda yerləşən, nəhəng siyasi və iqtisadi potensialı əhatə edən dost və qardaş ölkələrimizin birliyinin və səmərəli qarşılıqlı fəaliyyətinin bariz nümunəsidir.

Bu gün Türk dünyası özünün yüksəliş mərhələsinə qədəm qoymuşdur. Ölkələrimizdə hökm sürən sülh, əmin-amanlıq və sabitlik şəraiti, uğurla davam etdirilən inkişaf prosesləri xalqlarımızın və dövlətlərimizin böyük nailiyyətidir.

Altı il əvvəl Azərbaycanın qazandığı, ümumi fəxr və qürur mənbəyimiz olan Qarabağ Zəfəri regionda yeni geosiyasi reallığın əsasını qoydu. Bu Zəfər, eyni zamanda, ölkələrimizi iqtisadi, logistik və strateji cəhətdən bir-birinə bağlayan tarixi bir qapının – Zəngəzur dəhlizinin reallaşmasına zəmin yaratdı. Fürsətdən istifadə edərək, işğaldan azad olunmuş ərazilərimizin yenidən qurulmasında və bərpasında göstərdikləri dəstəyə görə təmsil etdiyiniz ölkələrə təşəkkürümü bildirirəm. Bu təşəbbüslər Azərbaycan xalqı tərəfindən dərin rəğbət və minnətdarlıq hissi ilə qarşılanır.

Bizim sarsılmaz dostluğumuz və qardaşlığımız bu gün vahid ailəmiz olan Türk Dövlətləri Təşkilatının artan beynəlxalq nüfuzunu və potensialını, Təşkilatın dünyanın güclü geosiyasi mərkəzlərindən birinə çevrilməsini şərtləndirən əsas amillərdəndir.

Türk Dövlətləri Təşkilatına sədrliyi çərçivəsində Azərbaycan ölkələrimiz arasında birliyin və həmrəyliyin daha da möhkəmlənməsinə, qarşılıqlı fəaliyyətimizin geniş potensialının reallaşmasına və bütövlükdə regionumuzun davamlı inkişafına, sülhə və təhlükəsizliyə töhfələr vermək üçün səylərini əsirgəmir. Keçən il Qəbələ Zirvə Görüşündə qəbul edilmiş Bəyannamə üzv ölkələrin siyasi, iqtisadi, enerji, humanitar, hərbi və təhlükəsizlik sahələrində sıx əməkdaşlığını və inteqrasiyasını ehtiva edən mühüm yol xəritəsidir.

Avropa ilə Asiyanı birləşdirən, Türk dövlətlərinin rifahına töhfə verən mühüm nəqliyyat-logistika layihəsi olan Orta Dəhlizin, o cümlədən Zəngəzur dəhlizinin və digər nəqliyyat bağlantılarının inkişaf etdirilməsi istiqamətində sədrliyimiz çərçivəsində səy göstəririk.

Türk Dövlətləri Təşkilatına sədrliyimiz dövrünə təsadüf edən əlamətdar hadisələrdən biri də Azərbaycanda Birinci Türkoloji Qurultayın 100 illiyinə həsr olunmuş Türk Dünyası Həftəsinin keçirilməsidir. Fürsətdən istifadə edərək, Təşkilata üzv ölkələrin dəyərli liderlərinə ehtiramımı ifadə edir, Qurultaya ünvanladıqları müraciətlərə və ümumiyyətlə Azərbaycan Respublikasının Türk Dövlətləri Təşkilatındakı sədrliyinin işinə göstərdikləri daimi dəstəyə görə təşəkkürümü bildirirəm.

Hörmətli tədbir iştirakçıları!

Müasir dünyada ənənəvi təhdidlərlə yanaşı, bəşəriyyəti narahat edən yeni çağırışlar, o cümlədən kibertəhdidlər meydana gəlir, yeni qeyri-sabitlik ocaqları yaranır, beynəlxalq hüququn böhranı müşahidə olunur. Bunların hamısı regional və qlobal problemlərin həlli istiqamətində ortaq gündəliyimizin müəyyənləşdirilməsini, mühüm məsələlərə dair vahid mövqeyimizin formalaşdırılmasını və bütün istiqamətlər üzrə fəaliyyətimizin əlaqələndirilməsini labüd edir. İkitərəfli əsasda həyata keçirdiyimiz hərbi təlimlər müdafiə sahəsində əməkdaşlığımıza töhfə verməklə, dövlətlərarası əlaqələrimizin strateji mahiyyətini bir daha bariz şəkildə təsdiq edir.

Türk Dövlətləri Təşkilatına üzv ölkələrin təhlükəsizlik şuraları arasında əməkdaşlıq Türk dünyasının inteqrasiya prosesinin sadəcə siyasi, iqtisadi və mədəni sahələrlə məhdudlaşmadığının, həm də uzunmüddətli strateji xarakter daşıdığının göstəricisidir.

Təhlükəsizlik Şuraları katiblərinin mütəmadi əsasda toplaşaraq aktual təhlükəsizlik məsələləri ətrafında fikir mübadiləsi aparması ortaq qlobal və regional təhdid və risklərin müəyyənləşdirilməsi və onların neytrallaşdırılması yollarının araşdırılması baxımından müstəsna əhəmiyyət kəsb edir, Türk Dövlətləri Təşkilatı məkanında təhlükəsizlik sahəsində dialoqu tamamilə yeni səviyyəyə qaldıraraq ortaq təhlükəsizlik arxitekturasının formalaşdırılmasına xidmət edir. Belə ki, beynəlxalq terrorçuluq, transmilli mütəşəkkil cinayətkarlıq, narkotik vasitələrin qanunsuz dövriyyəsi, dini ekstremizm, hibrid təhdidlərlə mübarizə, kritik infrastrukturun mühafizəsi kimi məsələlər istənilən dövlətin təkbaşına həll edə bilməyəcəyi məsələlərdir. Bu səbəbdən, mühüm koordinasiya mexanizmi olaraq, təhlükəsizlik şuralarının üzərinə böyük məsuliyyət düşür.

Əminəm ki, Toplantı zamanı gündəlikdə duran mühüm məsələlər ətrafında aparılacaq müzakirələr, irəli sürüləcək təşəbbüs və təkliflər ölkələrimizin əmin-amanlığına, təhlükəsiz gələcəyinə, Türk dünyasının qlobal təhdidlər qarşısında daha dayanıqlı və sarsılmaz bir gücə çevrilməsinə əhəmiyyətli töhfə verəcəkdir.

Toplantının işinə uğurlar arzulayıram”.

Hikmət Hacıyev Ərəb Media Forumunda Qarabağda və digər bölgələrdə Qafqaz Albaniyasının zəngin xristian irsi barədə danışıb

“Qarabağda və Azərbaycanın digər bölgələrində Qafqaz Albaniyasının zəngin xristian irsinin izləri var”.

“ARHD.MEDiA” xəbər verir ki, bunu Azərbaycan Respublikası Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev Ərəb Media Forumunda çıxışı ilə bağlı “X” hesabındakı paylaşımda qeyd edib.

“Qafqaz Albaniyasının qədim dövləti və onun zəngin xristian irsi haqqında danışdım. Bu irsin davamlı və xüsusilə əhəmiyyətli izlərini Qarabağda və Azərbaycanın digər bölgələrində görmək mümkündür.

Azərbaycanın əsrlər boyu davam edən multikulturalizm və dini birgəyaşayış ənənələrini, eləcə də ölkəmizin mənşəyindən və dini mənsubiyyətindən asılı olmayaraq zəngin mədəni və dini irsi qorumaq, mühafizə etmək və bərpa etmək öhdəliyini vurğuladım.

Həmçinin işğal illərində Azərbaycanın dini və mədəni irsinə qarşı həyata keçirilmiş genişmiqyaslı dağıntılar, təhqirlər və dəyişikliklər barədə danışdım. Tarixi həqiqətlərin qorunmasının və mədəni irsin gələcək nəsillər üçün saxlanılmasının vacibliyini qeyd etdim.

Gürcüstanın xarici işlər naziri, BƏƏ-nin iqtisadiyyat və turizm naziri ilə birgə iştirak etdiyim panelə “Euronews”un baş icraçı direktoru moderatorluq etdi”, - Hikmət Hacıyev vurğulayıb.

Xuraman Muradova: Bir kişi güclüdürsə, onun ruhunda bir qadın sevdası var...

Azərbaycan Respublikasının Birinci-Vitse Prezidenti Mehriban Əliyevanın ad gününə həsr olunmuş dərgidən...
Layihənin rəhbəri: Akademik, ATATÜRK mərkəzinin rəhbəri
Məsləhətçi: Azərbaycan Ağsaqqallar Şurasının İdarə Heyətinin üzvü, hüquq elmləri doktoru, professor, əməkdar müəllim, birinci Qarabağ müharibəsi iştirakçısı İbrahim Quliyev.
Həyatda elə sözlər var ki, insan onları eşidəndə bir anlıq dayanıb düşünür. Sadə görünən, amma dərin məna daşıyan fikirlər var ki, illərin, yaşanmışlıqların, sevginin və insan münasibətlərinin mahiyyətini özündə cəmləşdirir. “Bir kişi güclüdürsə, onun ruhunda bir qadın sevdası var” fikrim də məhz belə düşüncələrdəndir. Bu cümlə yalnız kişi və qadın münasibətindən danışmır. Burada sevginin insanı necə dəyişdirdiyi, ona necə güc verdiyi, həyatın çətinlikləri qarşısında insanı ayaqda saxlayan mənəvi dayağın haradan gəldiyi barədə böyük bir həqiqət dayanır.
Kişi cəmiyyət qarşısında güclü görünə bilər. O, ailəsinin, övladlarının, yaxınlarının yükünü çiyinlərində daşıya bilər. Çətinlik qarşısında sınmaya, ağrısını gizlədə, göz yaşını içində saxlaya bilər. Bəzən onun simasında sərtlik, davranışlarında qətiyyət, sözlərində əminlik görünər. Amma insanın görünən tərəfi onun bütün dünyası deyil. Hər güclü insanın içində heç kimin görə bilmədiyi, yalnız özünün bildiyi bir duyğu dünyası yaşayır. Həmin dünyanın ən qiymətli ünvanlarından biri isə sevgi ola bilər.
Sevgi insanın həyatında yalnız romantik hiss deyil. Sevgi bəzən bir qadının baxışında, bir sözündə, bir xatirəsində, bir gülüşündə, hətta bir insanın susmağında belə gizlənə bilər. Elə qadınlar var ki, onların varlığı kişinin həyatına sakitlik gətirir. Onlar kişinin qarşısında dayanıb “sən güclüsən” demədən onun gücünü hiss etdirirlər. Bəzən bir qadının “mən sənə inanıram” deməsi, kişinin illərlə axtardığı mənəvi dayağa çevrilir.
Güc yalnız xarici görünüş, imkan, mövqe və ya cəmiyyət qarşısında nümayiş etdirilən iradə deyil. Əsl güc insanın daxilindəki mənəvi dayaqdan doğur. O dayağın adı isə çox vaxt sevgidir.
Sevən insanın dünyaya baxışı dəyişir. O, sabah üçün daha böyük ümidlər qurur. Çünki artıq yalnız özü üçün yaşamır. Onun düşüncəsində bir başqa insanın xoşbəxtliyi, rahatlığı, gülüşü və gələcəyi də yer tutur. Bu isə insana məsuliyyət hissi verir. Məsuliyyət isə çox vaxt gücün ən mühüm mənbələrindən birinə çevrilir.
Bir kişi həqiqətən sevdiyi qadının qarşısında yalnız özünü deyil, bütün dünyasını nümayiş etdirir. O, həmin qadının yanında öz sərtliyini unuda, illərlə gizlətdiyi duyğularını ifadə edə bilər. Çünki sevgi insanın qarşısındakı insana etibar etməsidir. Güvən isə insanın ən həssas tərəflərini göstərmək cəsarətidir.
Cəmiyyət kişidən çox vaxt möhkəm olmağı tələb edir. “Kişi ağlamaz”, “kişi sınmaz”, “kişi dərdini deməz” kimi düşüncələr nəsildən-nəslə ötürülüb. Lakin həyat göstərir ki, insanın gücü onun heç vaxt ağlamamasında deyil. Əsl güc ağrı içində belə ayaqda qala bilməkdir. Bəzən insanı ayaqda saxlayan isə ona inanan bir qadının varlığıdır.
Bir qadın kişinin həyatında yalnız həyat yoldaşı, sevgilisi, ana və ya dost deyil. O, bəzən kişinin ruhunun ən dərin yerində yaşayan bir inamdır. Kişi uzaqlarda olsa belə, həmin qadının bir sözü, bir baxışı, bir xatirəsi onunla birlikdə yol gedə bilər. Hətta illər keçəndən sonra belə bəzi sevgilər insanın xarakterinin bir hissəsinə çevrilir.
Qadının gücü də məhz buradadır. O, bəzən bir kişinin həyatında görünmədən böyük iz buraxır. Bir qadının sevgisi kişini daha məsuliyyətli, daha diqqətli, daha məqsədli edə bilər. Çünki kişi bilir ki, onun uğurunu gözləyən, onunla fəxr edən, onun yoluna inanan biri var.
Tarix boyu böyük insanların həyatına nəzər saldıqda da sevginin insan xarakterində oynadığı rolu görmək mümkündür. Bir çox yaradıcı insanın əsərlərində, şairlərin misralarında, yazıçıların qəhrəmanlarında, bəstəkarların musiqisində qadın obrazı yalnız gözəllik simvolu olmayıb. Qadın çox zaman ilhamın, sədaqətin, ümidin, həsrətin və mənəvi gücün rəmzinə çevrilib.
Bəzən bir kişinin bütün həyatı boyu axtardığı söz bir qadının dilindən çıxır. Bəzən illərlə həll edə bilmədiyi bir məsələni onun sadə bir cümləsi aydınlaşdırır. Bəzən isə heç bir sözə ehtiyac qalmır. Sadəcə yanında olmaq kifayətdir.
Çünki həqiqi sevgi danışmaqdan çox, hiss etməkdir.
Yalnız ailə və sevgi münasibətləri çərçivəsində sadaladıqlarımı qiymətləndirmək də doğru olmaz. Mənim fikrim həm də insanın mənəvi dünyasının quruluşuna işıq salır. İnsan nə qədər sərt görünürsə-görünsün, onun daxilində mütləq incə, kövrək və qorumaq istədiyi bir dünya var. Həmin dünya bir insanın sevgisi, bir ananın duası, bir həyat yoldaşının sədaqəti, bir övladın gülüşü şəklində təzahür edə bilər.
Bəzən kişinin ən böyük gücü məhz sevdiyi qadına verdiyi dəyərdə görünür. Qadına hörmət edən kişi əslində öz mənəvi səviyyəsini nümayiş etdirir. Çünki sevgi yalnız “sevirəm” demək deyil. Sevmək qarşı tərəfin qəlbinə toxunmamaq, onu incitməmək, çətin günündə yanında olmaq, uğuruna sevinmək, kədərinə şərik olmaqdır.
Əsl sevgi sahiblik deyil, məsuliyyətdir. “Sən mənimsən” deməkdən daha çox, “mən sənin yanındayam” deməkdir. Bu iki cümlə arasında böyük fərq var. Birincisində sahiblik hissi, ikincisində isə sədaqət və mənəvi dayaq var.
Qadın da məhz belə sevgini arzulayır. O, yanında sadəcə güclü görünən kişi deyil, daxilən güclü olan insan görmək istəyir. Çünki xarici güc zamanla dəyişə bilər. Maddi imkanlar azala, vəzifələr dəyişə, həyatın şərtləri ağırlaşa bilər. Amma insanın xarakteri, sədaqəti və sevgisi bütün bunların fövqündə dayanır.
Bir kişinin həyatında elə bir qadın ola bilər ki, onun adını heç kim bilməsin, amma həmin qadın kişinin bütün uğurlarının görünməyən şahidi olsun. O qadın bəzən onun anasıdır, bəzən həyat yoldaşıdır, ilk sevgisidir. Bəzən isə taleyinin bir dönəmində qarşılaşdığı və ruhunda dərin iz qoyan insandır.
Ana sevgisi də kişinin gücünün ən böyük mənəvi qaynaqlarından biridir. Dünyanın ən ağır günlərində belə ananın duası insan üçün görünməz qalxan təsiri yaradır. Kişi böyüyür, ailə qurur, öz övladlarını böyüdür, amma anasının yanında yenə də övlad olaraq qalır. Ananın sevgisi kişinin həyatında heç vaxt köhnəlməyən, zaman keçdikcə dəyəri daha da artan bir sərvətdir.
Həyat yoldaşının sevgisi isə başqa bir mənəvi məsuliyyət yaradır. Birlikdə yaşanan illər ərzində qadın kişinin sevincinin də, kədərinin də şahidinə çevrilir. Çətin günlərdə onun səbrini, uğurlu günlərdə sevincini bölüşür. Bir evin divarları arasında görünməyən, amma ailənin bütün taleyinə təsir edən bir mənəvi bağ yaranır.
Bəzən kişinin ən böyük uğuru qazandığı vəzifə deyil, illər keçdikdən sonra yanında qalan insanların səmimi sevgisidir. Bəzən ən böyük sərvət bank hesabında deyil, bir qadının gözündə gördüyü etimaddır. Bəzən ən böyük mükafat medal və fəxri ad deyil, evə qayıdanda onu gözləyən bir insanın təbəssümüdür.
İnsan həyatı nə qədər uzun görünsə də, əslində çox qısadır. Bu qısa ömürdə insanın qazandığı ən qiymətli şeylərdən biri sevmək və sevilməkdir. Sevgi insanı dəyişdirir. O, insana səbir öyrədir, bağışlamağı öyrədir, gözləməyi öyrədir. Ən əsası isə insana özündən daha böyük bir məqsəd üçün yaşamağın nə olduğunu göstərir.
Bir kişi sevirsə, o, artıq tək deyil. Onun qərarlarının arxasında bir hiss, bir məsuliyyət, bir ümid dayanır. Bəlkə də buna görə sevgi insanı gücləndirir. Çünki insan özündən çox sevdiyi birinin naminə çətinliklərə dözməyə hazır olur.
Lakin sevginin gücü onun qarşılıqlı hörmət və azadlıq üzərində qurulmasındadır. Həqiqi sevgi insanı məhdudlaşdırmır, inkişaf etdirir. Sevdiyi insanın yolunu bağlamır, ona yol göstərir. Onu özünə bənzətməyə çalışmır, olduğu kimi qəbul edir. Kişi ilə qadın arasındakı münasibətin möhkəmliyi də məhz bu qarşılıqlı dəyərdən doğur.
Kişinin gücü onun arxasında duran qadının sevgisində, qadının gücü isə yanında dayanan kişinin hörmətində ola bilər. İki insan bir-birinə dayaq olduqda həyatın ağır yükünü bölüşmək mümkün olur.
Bəzən həyat kişini sərtləşdirir. Yaşanan xəyanətlər, uğursuzluqlar, itkilər, çətinliklər insanın ürəyinin ətrafında görünməz divarlar yaradır. Amma sevgi həmin divarların içərisində hələ də işıq saxlayır. İnsan nə qədər yorulsa da, bir qadının səmimi baxışında yenidən özünü tapa bilər.
Elə buna görə də “güclü kişi” anlayışını yalnız sərtliklə əlaqələndirmək düzgün deyil. Güclü kişi sevə bilən kişidir. Bağışlamağı bacaran, məsuliyyət daşıyan, ailəsini qoruyan, qadına hörmət edən, sözünün arxasında dayanan, səhv etdikdə bunu etiraf edə bilən kişidir. Çünki insanın mənəvi gücü məhz onun xarakterində görünür.
Qadın isə kişinin həyatında yalnız ilham mənbəyi deyil, həm də onun mənəvi güzgüsüdür. Kişi özünü bəzən həmin qadının gözlərində görür. Orada onun necə insan olduğu, nəyə dəyər verdiyi, hansı iz buraxdığı əks olunur.
Sevgi insanı böyük sözlərdən daha çox, kiçik davranışlarla tanıdır. Bir stəkan su vermək, yorğun halda halını soruşmaq, xəstəlikdə yanında olmaq, uğursuzluq zamanı onu tək qoymamaq, sevincini paylaşmaq — bütün bunlar sevginin gündəlik həyatda görünən sadə, lakin qiymətli formalarıdır.
Bəlkə də həyatın ən böyük həqiqətlərindən biri budur: insanın gücü hər zaman özündən gəlmir. Bəzən onu sevən bir insanın varlığı həmin gücü oyadır.
Bir kişi güclüdürsə, bəlkə də onun ruhunda həqiqətən bir qadın sevdası var. O sevda bəzən ana sevgisidir, bəzən həyat yoldaşının sədaqətidir, bəzən bir qadının xatirəsidir, bəzən isə heç vaxt dilə gətirilməyən, amma insanın bütün ömrü boyu qəlbində daşıdığı duyğudur.
Əslində insanı yaşadan da, çətinliklərə qarşı mübarizəyə ruhlandıran da, sabaha inam verən də məhz belə duyğulardır. Həyatın sərt üzünə qarşı insanın əlində qalan ən böyük mənəvi silah sevgidir.
Bu fikir bir cümləyə sığan böyük bir həqiqəti xatırladır: insanın görünən gücü ilə görünməyən sevgisi arasında dərin bir bağ var. Kişi dünyaya qarşı nə qədər möhkəm dayansa da, onun ruhunda bir qadının sevgisi, duası, xatirəsi və ya ona olan inamı varsa, həmin gücün arxasında bir ürəyin döyüntüsü də var.
Çünki bəzən bir kişinin bütün dünyaya qarşı dayanmasına səbəb olan, onun arxasında dayanan bir qadının səssiz sevgisidir.
Və bəzən bir qadının “sən bacararsan” deməsi, bir kişinin həyatında eşitdiyi ən böyük güc sözüdür.
Sevgi görünmür, amma insanı dəyişir. Əllə tutulmur, amma insanı ayaqda saxlayır. Səsi yoxdur, amma ən çətin anlarda içimizdə danışır. Bəlkə də məhz buna görə dünyanın bütün güclü kişilərinin arxasında görünən və ya görünməyən bir sevgi hekayəsi dayanır.
İnsan özünü dünyaya sübut edə bilər. Amma onu sevən bir qadının qəlbində öz yerini qorumaq daha böyük məsuliyyətdir. Çünki həyatın sonunda insanın qazandığı vəzifələrdən, titullardan, var-dövlətdən daha çox xatırlanan onun kimə necə münasibət göstərməsi, kimin həyatına necə toxunması və kim tərəfindən sevildiyidir.
Bir kişi güclüdürsə, onun ruhunda bir qadın sevdası var...
Bu sevda onun yoluna işıq salır, onu çətinliklər qarşısında möhkəmləndirir, həyatın ağır günlərində ayaqda saxlayır. Bəzən həmin sevdanın adı çəkilmir, amma onun izi kişinin davranışlarında, baxışlarında və həyatına münasibətində görünür.
Ən gözəl sevgi də elə budur — insanı özündən daha yaxşı bir insana çevirən, onu ucaldan, ona mənəvi güc verən və illər keçsə belə ruhunda yaşayan sevgi.
Məhz belə bir həqiqətin poetik ifadəsidir: gücün kökündə sevgi varsa, insanın ürəyi heç vaxt tamamilə tək qalmır.
P.S. Mən yaradıcı insan olduğuma görə yanaşma tərzim də bir başqadır. Hər insanın varlığına, onun fəaliyyətinə yaradıcılıq fəlsəfəsi, poetik düşüncələrlə yanaşıram. Mehriban xanım mən deyərdim ki, Azərbaycan xalqının incisidir, mirvarisidir. Mehriban xanımı mən əsl türk xatununa bənzədirəm.
Mehriban xanım Azərbaycanın tarixi obrazıdır, böyük qadın obrazı...

Xuraman Muradova
“VİP Milan” Hospitalın rəhbəri,
Azərbaycan Yazıçılar Birliyinin vəTürkiyə Yazarlar Birliyinin üzvü,
Özbəkistan Yazıçılar Birliyinin fəxri üzvüdür.
Əlişir Nəvai adına Özbəkistan Dövlət Universitetinin fəxri professoru,
Türk Dünyası Beynəlxalq Elmlər Akademiyasının fəxri professoru və
Vektor Beynəlxalq Elmlər Akademiyasının fəxriprofessoru

Prezident açılışdan sonra sükan arxasına keçdi - Video

Xəbər verdiyimiz kimi, Azərbaycan Prezidenti İlham Əliyev bu gün paytaxtın Qaradağ rayonunda “Qobustan” Günəş Elektrik Stansiyasının açılışında iştirak edib.

“ARHD.MEDiA” AzTV-yə istinadən dövlət başçısının açılış mərasimindən maraqlı görüntülərini təqdim edir:

Sentyabrın 15-də Yeni Azərbaycan Partiyası (YAP) Səbail rayon təşkilatının XII konfransı keçirilib.

Əvvəlcə xalqımızın Ümummilli Lideri Heydər Əliyevin abidəsi ziyarət edilib, abidənin önünə gül dəstələri düzülüb.

Tədbirdə Ulu Öndər Heydər Əliyevin, ölkəmizin ərazi bütövlüyü və suverenliyi uğrunda canlarını qurban vermiş şəhidlərin xatirəsi bir dəqiqəlik sükutla anılıb. Azərbaycan Respublikasının Dövlət Himni səsləndirilib.

Konfransda YAP Səbail rayon təşkilatının sədri Muxtar Nağıyev hesabat məruzəsi ilə çıxış edib. O, Ümummilli Lider Heydər Əliyevin qurucusu olduğu Yeni Azərbaycan Partiyasının ötən dövr ərzində xalqın etimadını doğruldaraq ölkənin siyasi, iqtisadi və ictimai inkişafında mühüm rol oynadığını bildirib. Qeyd edilib ki, Ulu Öndərin müəyyənləşdirdiyi siyasi strategiyanın Prezident, YAP Sədri İlham Əliyev tərəfindən ardıcıl şəkildə davam etdirilməsi ölkə tarixində mühüm nəticələrin əldə olunmasına imkan verib. Bildirilib ki, bu nailiyyətlərin ən mühüm mərhələlərindən biri torpaqlarımızın işğaldan azad edilməsi, Azərbaycanın ərazi bütövlüyü və suverenliyinin tam bərpa olunmasıdır.

Səbail Rayon İcra Hakimiyyətinin başçısı Vüqar Zeynalov bildirib ki, Ümummilli Lider Heydər Əliyevin uzaqgörən və məqsədyönlü siyasəti ölkənin sosial-iqtisadi və siyasi inkişafının fundamental əsaslarını formalaşdırıb. Bu strateji xəttin Prezident İlham Əliyev tərəfindən ardıcıl şəkildə davam etdirilməsi Azərbaycanın beynəlxalq mövqelərinin daha da möhkəmlənməsinə, dövlətçilik ənənələrinin inkişafına, eləcə də ərazi bütövlüyümüzün və suverenliyimizin bərpasına şərait yaradıb.

YAP İdarə Heyətinin üzvü, Ailə, Qadın və Uşaq Problemləri üzrə Dövlət Komitəsinin sədri Bahar Muradova YAP-ın ölkənin ictimai-siyasi həyatındakı rolundan danışıb. O, partiyanın rayon təşkilatının fəaliyyətinin sistemli şəkildə həyata keçirildiyini və qarşıya qoyulan vəzifələrin icrası istiqamətində mühüm işlər görüldüyünü diqqətə çatdırıb. Bahar Muradova Azərbaycanın ərazi bütövlüyünün və suverenliyinin tam bərpasını dövlətçilik tariximizin ən mühüm nailiyyətlərindən biri kimi qiymətləndirib.

YAP İdarə Heyətinin üzvü, Azərbaycan Dövlət İqtisad Universitetinin rektoru Ədalət Muradov bildirib ki, Prezident, Müzəffər Ali Baş Komandan İlham Əliyevin rəhbərliyi ilə həyata keçirilən siyasət, xalqın həmrəyliyi və ordumuzun gücü nəticəsində ərazi bütövlüyümüz və suverenliyimiz təmin edilib. O, bu nailiyyətlərin Azərbaycanın regionda və beynəlxalq müstəvidə mövqeyini əhəmiyyətli dərəcədə gücləndirdiyini qeyd edib.

Vətən Müharibəsi Qəhrəmanı Zaur Hüseynov, şəhid anası Mehriban Əmrahova qeyd ediblər ki, partiya ötən illər ərzində cəmiyyətin böyük inamını qazanaraq bu etimadı əməli fəaliyyəti ilə doğruldub.

YAP Mərkəzi Aparatının Təşkilat şöbəsinin müavini Rafael Gülməmmədov partiyanın təşkilatlanma istiqamətində fəaliyyətindən danışıb. O, YAP-ın uzun illər ərzində ölkənin ictimai-siyasi həyatında mühüm rol oynadığını və cəmiyyətin etimadını qazandığını bildirib.

Konfransda YAP Səbail rayon təşkilatının hesabat dövrü ərzindəki fəaliyyəti qənaətbəxş qiymətləndirilib və Yeni Azərbaycan Partiyasının VIII qurultayına nümayəndələr seçilib.

Sonda Yeni Azərbaycan Partiyasının Himni səsləndirilib.

ARHD.az

Prezident onları təltif etdi - Adlar

Azərbaycan Auditorlar Palatası üzvləri və əməkdaşları “Tərəqqi” medalı ilə təltif edilib.

“ARHD.MEDiA” xəbər verir ki, bununla bağlı Prezident İlham Əliyev Sərəncam imzalayıb.

Sərəncama əsasən, auditor fəaliyyətinin inkişafında xidmətlərinə görə Azərbaycan Auditorlar Palatasının aşağıdakı üzvləri və əməkdaşları “Tərəqqi” medalı ilə təltif edilib:

Ağayev Akif Ağa oğlu

Axundov Vaqif Xəlil oğlu

Bayramova Lamiyə Qəşəm qızı

Bənnayev Elxan Bəhmən oğlu

Cavadov Vasif Tofiq oğlu

Cəbiyev Hüseyn Kommuna oğlu

Eyvazova Mətanət Gümüş qızı

Əliyev Azər Hüseyn oğlu

Fətiyev Üzeyir Cəmil oğlu

Hacıəzizov İlham İsfəndiyar oğlu

Həsənova Adilə Teymur qızı

Qarayev Fəqan Şakir oğlu

Qurbanlı Ziya Tofiq oğlu

Məmmədov Şahbaz Müseyib oğlu

Süleymanova Elzadə Süleyman qızı.