Azərbaycan Kubokunun finalı Gəncədə olacaq

Futbol üzrə Azərbaycan Kubokunun finalı Gəncə Şəhər Stadionunda baş tutacaq.

“ARHD.MEDiA” xəbər verir ki, bu barədə Peşəkar Futbol Liqasının prezidenti Elxan Səmədov paylaşım edib:

“Düşünürəm ki, bu xəbər hər kəsin ürəyincə olacaq. Peşəkar Futbol Liqasının təklifi və AFFA prezidenti Rövşən Nəcəfin qərarı ilə Azərbaycanın futbol tarixində ilk dəfə Azərbaycan Kubokunun finalı Gəncə şəhər stadionunda keçiriləcək. Bu işdə dəstək olan Gənclər və İdman Naziri Fərid Qayıbova dərin təşəkkürümü bildirirəm. Tarixi məkanda tarixi matçda görüşənədək!”.

Şahin Mustafayev yenə bu Federasiyanın prezidenti seçildi

Baş nazirin müavini Şahin Mustafayev növbəti müddətə Azərbaycan Stolüstü Tennis Federasiyasının (ASTF) prezidenti seçilib.

“ARHD.MEDiA” xəbər verir ki, 2014-cü ildən Federasiyaya rəhbərlik edən Şahin Mustafayev, qarşıdakı 4 il ərzində də Azərbaycan stolüstü tennisinin daha da inkişaf etdirilməsi, idmançıların beynəlxalq arenada daha böyük uğurlar qazanması və yeni perspektivli tennisçilərin yetişdirilməsi istiqamətində səmərəli fəaliyyətini davam etdirəcək.

Yelkən idmanı üzrə açıq Azərbaycan çempionatı başa çatdı - Fotolar

Gənclər və İdman Nazirliyi ilə Azərbaycan Su İdman Növləri Federasiyasının birgə təşkilatçılığı ilə keçirilən yelkən idmanı üzrə açıq Azərbaycan çempionatına yekun vurulub.

“ARHD.MEDiA” xəbər verir ki, federasiyanın yelkən mərkəzində, Şıxov çimərliyi ərazisində təşkil olunan çempionatda Azərbaycan və Türkiyədən olan idmançılar Optimist və ILCA4 siniflərində mübarizə aparıblar.

Üç gün davam edən yarış ərzində idmançılar küləyin istiqaməti və sürətinə uyğun müəyyənləşdirilən marşrut üzrə müxtəlif yürüşlərdə (reyslərdə) bacarıqlarını nümayiş etdiriblər. Yekun sıralama bütün yürüşlərin nəticələri əsasında hesablanan xallar nəzərə alınmaqla müəyyənləşdirilib.

Bağlanış mərasimində çıxış edən gənclər və idman naziri Fərid Qayıbov Azərbaycanda idmana göstərilən dövlət dəstəyindən danışıb. Nazir Azərbaycan yelkənçiləri ilə yanaşı, yarışda iştirak edən Türkiyə təmsilçilərini də salamlayıb, çempionatın yüksək səviyyədə təşkil olunduğunu vurğulayıb. Fərid Qayıbov idmançıları təbrik edərək onlara gələcək yarışlarda uğurlar arzulayıb.

Çempionatın qalibləri diplom, medal və federasiya tərəfindən hədiyyələrlə mükafatlandırılıb. Yarışda iştirak edən bütün idmançılar sertifikatla təltif olunublar.

Həmçinin 2025-ci ilin Azərbaycan çempionları Kamal Bəşirli (Optimist) və Davud Babazadənin (ILCA4) adları yelkən idmanının ənənəvi şərəf lövhəsinə həkk olunub.

Mərasimin sonunda Azərbaycan Su İdman Növləri Federasiyasının təşkil etdiyi yelkən idmanı, avarçəkmə və kanoe üzrə Yay məktəbinin iştirakçılarına da sertifikatlar verilib.

Yarışın texniki nəticələri aşağıdakı kimidir:

AÇIQ AZƏRBAYCAN ÇEMPİONATI

OPTİMİST / U-12

1. Tunahan Piker – Türkiyə

2. Alya Bayraktar – Türkiyə

3. Kamilla Həsənova – Azərbaycan

OPTİMİST / QIZLAR

1. Janset Tuğan – Türkiyə

2. Səma Mansurzadə – Azərbaycan

3. Alya Bayraktar – Türkiyə

OPTİMİST / ÜMUMİ KATEQORİYA

1. Mert Durkal – Türkiyə

2. Rüzgar Uzel – Türkiyə

3. Kamal Bəşirli – Azərbaycan

AZƏRBAYCAN ÇEMPİONATI

OPTİMİST / U-12

1. Kamilla Həsənova – Azərbaycan

2. Leyli Məmmədli – Azərbaycan

3. Gülnisə İsmayılova – Azərbaycan

OPTİMİST / QIZLAR

1. Səma Mansurzadə – Azərbaycan

2. Yağmur Həsənli – Azərbaycan

3. Kamilla Həsənova – Azərbaycan

OPTİMİST / ÜMUMİ KATEQORİYA

1. Kamal Bəşirli – Azərbaycan

2. Nurlan Ağazadə – Azərbaycan

3. Amin Cəlilzadə – Azərbaycan

ILCA4

1. Nərgiz Məmmədova – Azərbaycan

2. Amira Bayramova – Azərbaycan

3. Davud Babazadə – Azərbaycan

Messi zirvədə möhkəmləndi

Ulduz futbolçu Lionel Messi MLS-də bombardirlər yarışında liderliyini möhkəmləndirib.

“ARHD.MEDiA” xəbər verir ki, 39 yaşlı argentinalı ulduz “Neşvill”lə oyunda “İnter Mayami”nin ikinci qolunu vuraraq mövsümdə 19-cu dəfə fərqlənib.

Lakin “Neşvill” əlavə vaxtda hesabı 2:2-yə çatdıraraq “İnter Mayami”ni qələbədən məhrum edib.

“Neşvill” 4-cü dəqiqədə Sem Surricin qolu ilə hesabı açıb. “İnter Mayami” 19-cu dəqiqədə Messinin künc zərbəsindən sonra rəqib müdafiəçi Rid Beyker-Vaytinqin avtoqolu ilə hesabı bərabərləşdirib.

Messi 62-ci dəqiqədə Rodriqo De Paul ilə ötürmə mübadiləsindən sonra təxminən 18 metrdən dəqiq zərbə ilə komandasını önə keçirib. Bu qolla argentinalı futbolçu MLS-də bombardirlər siyahısında liderliyini möhkəmləndirib.

Messi daha iki dəfə fərqlənməyə yaxın olub. Onun zərbələrindən biri dirəyə dəyib, digər epizodda isə “Neşvill” müdafiəçisi topu son anda uzaqlaşdırıb. Lakin əlavə vaxtın ilk dəqiqəsində Surric ikinci qolunu vuraraq oyunun yekun hesabını müəyyənləşdirib.

Bu nəticədən sonra “İnter Mayami” həm Şərq Konfransında liderlik, həm də “Supporters’ Shield” uğrunda mübarizədə “Neşvill”dən 9 xal geri qalır. “Neşvill” isə bu mövsüm “İnter Mayami”yə qarşı keçirdiyi dörd oyunda da məğlub olmayıb.

Fərid Qayıbov: "Formula-1" milyonların diqqətini Azərbaycana yönəldir"

"Formula-1" üzrə yubiley Qran-prisi Bakının Dünya İdman Paytaxtı olduğu xüsusi bir ildə keçirilir. Azərbaycan Qran-prisi 2026-cı ilin əsas idman tədbirlərindən biri olmaqla, paytaxtımızın beynəlxalq idman mərkəzi kimi mövqeyinin daha da möhkəmlənməsinə töhfə verəcək".

“ARHD.MEDiA” xəbər verir ki, bu barədə gənclər və idman naziri Fərid Qayıbov Bakı Şəhər Halqası (BŞH) Əməliyyat Şirkətinin mətbuat xidmətinə açıqlamasında bildirib.

O bu il keçiriləcək Azərbaycan Qran-prisi haqqında fikirlərini bölüşüb:

"Formula-1"in əhəmiyyəti yalnız yarışla məhdudlaşmır. Qran-pri idman turizminin inkişafına təkan verir, yerli biznes üçün əlavə imkanlar yaradır və milyonlarla azarkeşin diqqətini Azərbaycana yönəldir".

Xatırladaq ki, yarış sentyabrın 24-26-da keçiriləcək.

“Startup World Cup”ın regional finalı “Baku ID” çərçivəsində keçiriləcək

“Pegasus Tech Ventures” tərəfindən təşkil olunan və dünyanın altı qitəsində 200-dən çox regional yarışı birləşdirən “Startup World Cup” beynəlxalq startap yarışmasının Azərbaycan üzrə regional finalı sentyabrın 17-də Bakıda keçiriləcək.

“ARHD.MEDiA” xəbər verir ki, artıq üçüncü dəfə SABAH.angels (SABAH Mələk İnvestorlar Klubu) tərəfindən təşkil olunan regional final Qafqaz, Mərkəzi Asiya, Yaxın Şərq və Türkiyədən olan startapları bir araya gətirəcək.

Regional final 17–18 sentyabr tarixlərində SABAH.HUB İnnovasiya Mərkəzinin təşkilatçılığı, dövlət qurumlarının və özəl sektor tərəfdaşlarının dəstəyi ilə keçiriləcək “Baku ID” innovasiya festivalı çərçivəsində baş tutacaq. Festival bu il ilk dəfə innovasiyanın episentri olan “SABAH.city” innovasiya şəhərciyində keçiriləcək.

Müraciət mərhələsində artıq 10-dan çox ölkədən 100-dən yuxarı startap qeydiyyatdan keçib. Qiymətləndirmənin nəticələrinə əsasən seçiləcək 10 startap regional finalda öz biznes modellərini, texnoloji həllərini və böyümə potensialını yerli və beynəlxalq ekspertlərdən ibarət jüri heyəti qarşısında təqdim edəcək.

Qiymətləndirmə zamanı həllin real bazar probleminə uyğunluğu, biznes modelinin dayanıqlılığı və layihənin qlobal miqyasda böyümə potensialı əsas meyarlar sırasında olacaq. Bununla yanaşı, iştirakçılar investorlar, sahibkarlar və innovasiya ekosisteminin nümayəndələri ilə birbaşa əlaqələr qurmaq imkanı əldə edəcəklər.

SABAH Mələk İnvestorlar Klubunun direktoru Alya Abbaszadə bildirib ki, məqsəd yalnız bir startap seçərək onu San-Fransiskoda keçiriləcək qlobal finala göndərmək deyil:

“Startup World Cup” vasitəsilə regionun perspektivli startap təsisçilərini beynəlxalq investorlarla birbaşa əlaqələndirmək və Bakıdan qlobal bazarlara yeni körpülər yaratmaq istəyirik”.

Regional finalın qalibi noyabrın 6-da San-Fransiskoda keçiriləcək “Startup World Cup Grand Finale” yarışmasında iştirak etmək və 1 milyon ABŞ dolları həcmində investisiya mükafatı uğrunda mübarizə aparmaq hüququ qazanacaq.

“Startup World Cup”ın regional finalının “Baku ID” çərçivəsində keçirilməsi beynəlxalq yarışın yaratdığı imkanları festivalın investor və innovasiya şəbəkəsi ilə birləşdirəcək. Bununla da region startapları qlobal bazarlara çıxış, potensial investorlarla əlaqələr qurmaq və layihələrini beynəlxalq səviyyədə təqdim etmək üçün yeni imkanlar əldə edəcəklər.

Son müraciət tarixi: 10 sentyabr 2026-cı il

Müraciət forması: startupworldcup.io/azerbaijan-regional-2026

“Baku ID” innovasiya festivalına qeydiyyat: bakuid.com/tickets

UEFA Çempionlar Liqası: İlk turun növbəti oyunları keçiriləcək

Bu gün UEFA Çempionlar Liqasında 2026/27 mövsümündə növbəti oyunlar keçiriləcək.

“ARHD.MEDiA” xəbər verir ki, Liqa mərhələsinin ilk turunda daha altı qarşılaşma baş tutacaq.

Belə ki, "Ştutqart" "Vikinq"lə, "Barselona" "Feyenoord"la, "Liverpul" "Atletiko Madrid"lə, PSJ "Slovan Bratislava" ilə, "Sportinq" "Qalatasaray"la, "Napoli" isə "Arsenal"la üz-üzə gələcək.

9 Sentyabr

UEFA Çempionlar Liqası

I tur

Saat 20:45, "Ştutqart" - "Vikinq";

Saat 20:45, "Barselona" - "Feyenoord";

Saat 23:00, "Liverpul" - "Atletiko Madrid";

Saat 23:00, PSJ - "Slovan Bratislava";

Saat 23:00, "Sportinq" - "Qalatasaray";

Saat 23:00, "Napoli" - "Arsenal".

Xatırladaq ki, ilk oyun günündə baş tutan matçlarda aşağıdakı nəticələr qeydə alınıb:

"Real Madrid" - "İnter" - 2:1;

"Portu" - "Mançester Siti" - 0:2;

"Brügge" - "Aston Villa" - 2:3;

AEK - LASK - 1:0;

"Lill" - "Real Betis" - 2:3;

"Borussiya Dortmund" - "Vilyarreal" - 3:2.

"Liverpul" 17 ildən sonra titul sponsorunu dəyişir

"Liverpul" klubu 17 ildən sonra titul sponsorunu dəyişəcəyini açıqlayıb.

“ARHD.MEDiA” xəbər verir ki, 2027/28 mövsümündən etibarən klubun kişi və qadın komandalarının, həmçinin akademiyanın formalarında Türkiyənin "Turkish Airlines" aviaşirkətinin loqosu yer alacaq.

2010-cu ildən "Liverpul"un titul sponsoru olan "Standard Chartered" isə 2027-ci ilin iyunundan qlobal tərəfdaş statusunda əməkdaşlığı davam etdirəcək.

"Turkish Airlines"la müqavilə beşillikdir. Sazişin ümumi dəyəri 300 milyon funt sterlinqdir. Bu, mövsümə 60 milyon funt sterlinqdən çox gəlir deməkdir. "Liverpul" bu anlaşmanı Premyer Liqa tarixində yalnız forma sponsorluğunu əhatə edən ən gəlirli müqavilə hesab edir.

"Sabah"ın "Mançester Yunayted" ilə oyunu sükutla başlayacaq - SƏBƏB

UEFA Çempionlar Liqasının 2026/27-ci illər mövsümünün liqa mərhələsi çərçivəsində bu həftə baş tutacaq ilk turun bütün qarşılaşmaları bir dəqiqəlik sükutla başlayacaq.

“ARHD.MEDiA”nın UEFA-nın rəsmi saytına istinadən yaydığı məlumata görə, bu qərar Nepalda baş vermiş dağıdıcı daşqınlar zamanı həyatını itirən insanların xatirəsini yad etmək məqsədilə qəbul edilib.

Eyni zamanda, futbolçular yaşıl meydançaya xüsusi dəstək mesajı ilə qədəm qoyacaqlar - komandalar əllərində "Sən tək deyilsən, Nepal!" şüarı əks olunan pankart tutacaqlar.

UEFA prezidenti Aleksander Çeferin vurğulayıb ki, bütövlükdə Avropa futbol ailəsi Nepal xalqının kədərini bölüşmək və onlara dəstək nümayiş etdirmək üçün bir araya gələcək.

Xatırladaq ki, ilk turun həyəcanı sentyabrın 8-10-u aralığında yaşanacaq. Təmsilçimiz "Sabah" isə turnirdəki start matçına sentyabrın 10-da İngiltərədə çıxacaq. Komandamızın "Mançester Yunayted"ə qarşı əfsanəvi "Old Trafford" stadionunda keçirəcəyi duel Bakı vaxtı ilə saat 23:00-da start götürəcək.

“Lion”a qayıtmaq istəyirdi, icazə vermədilər - Karyerasını bitirə bilər

“Lion”un keçmiş hücumçusu Kərim Benzema doğma klubuna olan sevgisi və hörməti səbəbindən maaşından imtina edərək yenidən Fransa təmsilçisində oynamağa hazır olub.

“ARHD.MEDiA” “L’Equipe”ə istinadla xəbər verir ki, Liqa 1 klubunun rəhbərliyi bu yay 38 yaşlı futbolçunun qayıdışı variantını nəzərdən keçirsə də, transfer gözlənilməz maneə ilə qarşılaşıb.

Nəşr yazır ki, fransalı ulduz avqustun 31-də Səudiyyə Ərəbistanı klubu ilə müqaviləsini ləğv etsə də, o, 2030-cu ilə qədər ölkə çempionatının səfiri olaraq qalır:

“Səudiyyə Ərəbistanının Dövlət İnvestisiya Fondu (PIF) imic müqaviləsi olan futbolçuların başqa ölkələrin çempionatlarında çıxış etməsinə qarşı çıxır. Fransa Liqa 1-i üçün istisna olunması ilə bağlı tərəflər arasında aparılan danışıqlar isə çıxılmaz vəziyyətə gəlib. Həmçinin müqavilə bitəndə Benzemanın 43 yaşı olacaq”.

Qəzetin yaydığı məlumata görə, yaranmış bu mürəkkəb vəziyyət fonunda təcrübəli hücumçunun yaxın vaxtlarda peşəkar futbolçu karyerasını yekunlaşdırmaq ehtimalı kəskin artıb. Kərim Benzemanın artıq cari mövsümə sonuncu ili kimi hazırlaşdığı qeyd olunur.